Rev. Fr. Florian Kam leh Rev. Fr. Timothy Cinno Phawkna Mualsuang Phuhna
(24.6.2022)
*******
Sawbua Parish a cing akem Rev. Fr. Joseph Lal Ngil Neia ii makaihna leh vaihawm siamna tawh a hong nusia sa Rev. Fr. Florian Zam Kho Kam leh Rev. Fr. Timothy Thang Do Cin te ii Leitung hong nusiat zawh kum (1) a cinni (June 24, 2022) ni-in amaute kha aa ding Missa Biakpiakna pen St. Anthony of Padua Biakinnpi sungah nasia takin ki bawl sak hi.
Missa Biakpiaknna pen Khampat Zone a cing akem Rev. Fr. John Tual Khan Suum (VF & PP of Khampat) in makaih in Rev. Fr. Cyril Dong Suan Pau (PP of Khumnuai) in Pasian thutawh kha –an vakna hong nei hi.
Amah in Siampite leh thuzuite kizopna a thupitna pen Tuucing pa leh Tuu te kizopna tawh gentehin kha-an vakna a neih khitteh Fr. Florian Kam leh Fr. Timothy Cinno te a phawkna thute zong gen khia hi.
Missa Biakpiakna sungah Siampite (7), Nungak Siangtho te leh thuzui mite vekpi gawm (300) kim pha hi.
Missa Biakpiakna a man khit cingin Biakinn pua lam Tonu Suangbuk maiah a hong nusia sa Siampi te nih phawkna mualsung thupha piakna pen inntek Siampipa Rev. Fr. Joseph Lal Ngil Neia in makaih hi. Biakinn tual ah Mualsung thupha piakna teng a man khit cingah Siampite leh thuzui mite Biakinn sungah lut kik in tua sungah hun bawlna khat ki nei hi.
Hih hun bawlna pen Kuanglian Sia pa Sia Paul Thang Ngaih Mung in makaih in hungelna te a ban ban in ki zomto hi. Amasa pen in Inntek Siampipa Rev. Fr. Joseph Lalngilneia in hih Mualsuan phuhna dingin ngimna, gelna te a tangtungsak Pa Pasian tungah lungdamkohna leh hih pawi Missa Biakpiakna sunga a kihel Siampite, Nungak Siangtho te leh thuzui mite tungah lungdamkohna nei hi.
Tua khitteh Siampite ih cih pen Pasian leh thuzui mite kizopna dingin Vantung leh Leitung kikal ah kah lei bangin Sacramentu te piakna tawh a hong kizom sak, Sacramentu a hongpia den te a hih manun a hong nusia sa Siampite phawkin amaute aa ding thu ngetsak ciat ni. Eite in amaute tung pan ih ngah thupha tam mah mah a hih manin lungdam kohna in a muate kha aa ding thungetsak ciat ni ci-in thuzui mite tungah hanthohna nei hi.
Hun gelna tawh kizui-in Zongeina leh la tuam tuam sakna te zong om hi. Tua ban ah Tuikhal Sia pa Sia Jacob Mang Do Lian in Fr. Florian Kam pen Sawbua Parish Priest a sem masa ahihna thu, ama ii thuzui mite a deihsakna leh a hanciamna, amah tawh aki thuahna thu te leh (2008- 2014) dong Sawbua Parish Priest a sepna thu te gen khia hi.
Tua ban ah Fr. Timothy Cinno pen (2018-2021) June 24 ni a hong nusiatni dong Sawbua Parish Priest a hihna thu leh Fr. Cinno ii nasepna, amah tawh a kithuahna leh a phawkna thute gen khia hi.
Amah in tuni pen a hong nusia sa ih Siampite ih phawkna hangin ih lungleng mah mah hi a hi zongin hi bangin amuate phawk thei-in in amuate ih itna tawh mualsuang phut thei ih hih manin ka lungdam hi. Ka lungsim sungah Lunglen leh lungnopna ki thuah hieu hiau hi ci-in a lungsim puakzia pulaak khia hi.
A thukhupna ah Mualsuang phuhna ii thupitna teng a gen khitteh ih Zongeina ah zong mi thupi diak te ih phawk diak te aa ding bek Mualsuang ki phut zo hi. Tu ni in ih Parish in bang hangin Mualsaung phut ih hi hiam cih leh ih Siampite in mi thupite a hih na leh amaute ih phawkna lian mah mah ahih manin Mualsung a phuhsak ih hi hi ci-in Mualsuang phuhna na ii a deihna bulpi te gen khiatna nei hi.
A tawpna ah Parish mintawh a hi zongin, Khua tuam pan leh mimal in a hong nusia a Siampi te ii innkuanpih te aa ding letsong piak na ki nei hi. Tua khitteh Siampite thupha piakna tawh hun teng khempeuh ki man siangin hih kikhopna sunga a kihel mite khempeuh in sun-an nekna nei khawm uh hi.
Hih Mualsuang phuhna tawh kisai-in sum bei teng leh hih hungelna sungah a kihel mimal kim ii nek ding Vok nih go a hih na thuzong Makai te in pulaak khia in sun-an nekna tawh hun te nuam tak in ki man siang hi.
2022-06-30 08:24:45
