(Sep 7, 2021)

*******************

Meeting bawlna mun: Siadawpa lengladona khan

Meeting kah teng : Bishop Felix Lian Khen Thang

Fr. Raphael Suang Cin Khup

Fr. Joseph Pau Lian Kham

Fr. John Hau Hawm Mang

Fr. Andrew Go Khan Nang

Fr. David Sut Hau Lian

Fr. Fr. Joseph Thang Nen Zo Mung

Chairman: Fr. David Lian

Hih meeting bawlna bulpi pen Covid-19 natna lungno ei kiang a hong tun ciangin cinate huh theih na dingin Siampite kikum in Diocese min tawh Covid-19 Response Committee phuan khia in (July 8, 2021) ni pan kipan thuzui mite huhna sumte tawh Kawlpi Siadaw huang sungah cina mite kivelna, zatui piakna leh Zato lup theih na ding dong ki vaihawmin na kisam in tua nasepna te khempeuh Siadawpa cidam in a hong tun kik ciang amah tungah gen khiatna leh mailam ah bangci bangin kalsuan ding cih ngaihsut hoih dotna ahi hi.

​               Hih meeting hunsung ah Fr. Andrew Go Nang in Covid-19 Response Committee a ki phuatkhiat zia, kua teng ki hel in bangci bangin pan mun kila, koi mun teng pan huhna ki ngah cih thu te leh MAM leh OPD tawh kisai nasep zia te, Siavuan/Syama te tawh bang ci bangin kipawlin na sem khawm cih thu te hong pulaak khia hi.

​                Fr. John Mang in hih OPD leh Zato lup theihna ding a ki bawl pan ki pan cina mi bang zah hi mun pan ki vel, Covid natna tawh zato lum mi bangzah pha, tua te lak ah bangzah in damna ngah in bangzah in leitung hong nusia cih te gen khiatna hong nei hi.

​                Fr. Raphael Khuppi in huhna sum koi mun teng pan kingah, bang zah kingah in bang cibang in ki zang cih thu te sum ngahna leh sum zatna teng a vekpi in lahkhiatna hong neih khit banah Mobile Clinic ci-in Kawlpi tawh a kinai na khua tuam tuam te ah Siavuan/Syama te tawh cinate velin zatui/zaha a kisap bangin a piak khiatna te hong gen khia hi. Tua banah Zone level leh Parish level in Buhtang,beesan leh sathau te ki hawm khia zo in Mobile Clinic te ki pai zo nailo ahih manin mailam hunte ah mun khempeuh ah tunzawh na ding a kisapna thute zong hong gen hi.

​               Fr. Joseph Kham in hun tawh kizui-in kigin kholhna a bawl zia, Khangno Volunteer bangzah in hongsem, Bang hun in Oxygen leh zatui zaha te kingah thei, kigin kholhna a tawm leh buaina tam ki thuak dinga, kiginkholhna a tam leh Covid-19 Fourth Wave a hong tun khak leh zong lim tak in kikem thei ding ih hih manin ih sepsa te banah mailam aa ding bangci bangin kigingkhol ding cih thu te hong gen khia hi. Tua ban ah tu-in cina teng khempeuh a dam ding hita a hih manin zato ih khak ding zia leh gal hong tung kha leh bangci bangin mite tungah huhna pia zo ding cih ama ngaih sutna te hong pulaak khia hi. Tua banah Volunteer khangnote khempeuh in galsungah a kisap hunin liamna angah mite bangci bangin don thei ding, Emergency hun ah Khangnote khempeuh in Liammate a bawl thei-in zatui/Zaha a piak theih nangun tusungteng in Training bawlsak zo leng hoih ding hi cih thu te zong hong pulaak khia hi.

​               Siadawpa in hih nasepna teng tungah a thangahna teng a pulaak khitteh mailam (Future Plan) ding zong hong gen khia in hih nasepna te zong Kawlpi kim teng bek hi lo in Diocese buppi ah ih hih zawh nading, Diocese level, Zone level leh Parish level in zong ih sepzawh nang a kisapna thu te leh huhna ahongpia mite khempeuh tungah a lungdamna thu te hong gen khia hi.

                  ​Tua khitteh huhna hongpia gamsung gampua aa om thuzui mite in a hong panpih zawh den nang leh hih nasepna ah huhna hongpia avei phadeuh leh a maikai teng tawh (Sep 21, 2021) ni-in Zoom meeting neih khop ding khensatna ki nei-in Siadawpa tungpan thupha piakna tawh meeting ki mansak hi. Covid hunsung teng pen nasepna te Galkapte in a hong nawngkaisak ding ki lau ahih manin Online ah ki teen ngamlo hi. Tua te khempeuh pen Zato khak khit hun hoih ciang a lem bang bangin Online pan ki en kik thei ding hi cih zong hong theisak nuam ing. Lungdam.

                                                                                                                  Thu ciamteh- Fr. Joseph Zo Mung.

#RVATedimchinservice

#KalayDiocese

#meeting