Kum kivei in Nun kikhel zong
Lumbang Kisung ciat leng e!


Kum kivei in hun ten
hong kheng mahleh zong,
Kumlui tual len nite aw,
cikciang lungah ka ngilhzo diam.
Lungah ka ngilh zolo ding aw e,
tual len nun nuam zai la-in
na sutsut ning.

Kum kivei-in, hun le ni ten
hong khengkheng mahleh zong,
Kumlui tong kupnate aw,
sinlai ah albang a mang zo diam.
Sinlai albang mang zolo ding aw e,
beng hem in na zaza ning.



Kum kivei in,
nunzia kikhel mahleh zong,
Nuihciam lelin sabang
ih kholhnate aw,
huihkhi sem bang a mangzo diam.
Huihkhi sem bang
mang zolo ding aw e,

sinlai phuh bang kho den ding hi.


Kumkhen zingni
mual hong suak e,
It leh ngaih aw
vaibang dawn khawm veni e!
Vaibang dawn ding lung ka gel ciang,
Sian sung zalsa zua pa ciin u ka ngai e.
Sian sung zalna Sian anglai pan
ham bang huai in,
am bang hong pakpih ding aw!


Kum kivei in, simlei nunzia
mel ah kikhel mahleh zong,
Tul lo kiam lo, a kikhel lo
itnakip tawh nau bang hong kem,
Sianmang khanuai
lumbang kisung ciat leng e!

Nimdildial