Biakna Ukpa Pope Francis in Bishop thakte thu vaikhakna

    2019 September kha ni (12) in, Pope Francis in, 2018 kum sung leitungbup Bishop ngahthak-te tawh a kimuhkhopna ah, Pasian tawh eite i kinai mahbangin, mi hingte zong tawh kinai tak om khawm theih nading thupi mahmah ci-in a gen hi.

    Pope in eite nasep in pawlpi tawh pumkhat i hih mah bangin, leitung in zong Pasian thupha Sacramentu te tawh a kinai zawk theih nadingin vaihawm a, sep ding kisam hi. Leitung in zong Pasian tawh kinai zawk theina dingin a hong zongta hi. Tua ahih man tuucing hoihte in, ama nuntaakna a piakkhiat zawh kei leh pawlpi adingin, amah omlo tawh kibang hi, ci-in a theisak hi.

    Pope in, Catholic Bishopte vaaipuak tavuan lian pen in hih thu nam (5) te hi, ci-in agen hi. Tua te in-
1. Pasian sungah a bucing nuntaakna.
2. Pasian Tanu/pa te tawh kipawlkhopna.
3. Samalitan mihoihpa bang a omna.
4. Mizawng gentheite tawh kipawlkhopna.
5. Thu ngaih siamna.

1. PASIAN SUNGAH A BUCING NUNTAAKNA

    Pasian sungah a bucing nun-taakna in, Bishop thakte adingin, thupi-in a kisampha mahmah nuntakna ahih mahbangin, eite zong tua bang daan a nungta siam dingin kisam pah hi. Pasian tawh kinaitak i nuntak keileh amah tawh kizopnate zong hong om theilo ding hi. Tua mahbangin khaici vawh pa tawh kinai tak i om keileh khaicite nungta a khan theih nadingin lungduai tak i ngak zo kei kha ding hi.

2. PASIAN TANU/PA     TE TAWH KIPAWLKHOPNA

    Eite sepkhiat ding a thupi pen in Pasian in eite tunga hong ap, a tate tawh kipawlkhop nading ahih mahbangin amau unau sanggam bangin nei a, lungdam nopsak hun, lungkham dah hun ciangin, a maute tawh kibangin lungsim takpi tawh thuakpih ngiat dingin kisam hi. Ei leh ei vaang kipia hi loin, Topa Jesu kammal mahbangin, midangte tungah hehpih siam theih nadingin Bishop thak ten hoihtak ngaihsunpha un. Eite nun-taakna tawh Pasian thu teti a pangte ahi dingin kisam hi. Leitung mite ngaihsut dan bang ahi lo, Topa hong itna tawh nuntaak zawh nadingin tha na san tek un.

3. SAMALITAN MI HOIHPA BANG A OMNA

    Bishop thakte aw, Topa tawh na kinaina un, kampau siamna bek tawh hi loin, ei le ei kipah-tawina zong hi loin, midangte a dingin, kiniamkhiatna tawk tawh sila dinmun i lak kul ding hi. Samalitan mihoihpa mahbangin i nuntaak theih ding kisam hi. Thu sia la siate kitheih mawh bawl a, mikhut tawh gul a man nuamte hi loin, Sabuai tung bek ah hun a beisakte zong hi loin, mite adingin i hun neihte zangin piakhia a, a maute tawh a tawntung kithuah den dingin kisam hi. Samalitan mi hoihpa in, cina pa liammate zatui anuh khitteh a tuamsak mah-bangin, Pasian tate tawh kipawl-khopna in, a maute lungkham dahnate pan un, lungnop suah-takna, angah theih nadingin,  a maute mahbang a, thuakkhop ngiat dingin kisam mahmah hi.

4. MIZAWNG GENTHEITE TAWH KIPAWLKHOPNA

    Mizawng a gentheite bangci zah ciangin donin, panpih a, koici bang daanin kipawlkhawm cih thu, amaute sungah i bawlna panin kitheikhia hi. A siangtho nuntaakna in, Topa Jesu sung a kicing nuntakna tawh teti panna ahi hi. Tuucing hoihte gamtatna in, eite a hong umcih mi gentheite huh a panpihna ahi hi. Kong gennop a thu bulpi-in, nang Pa bangin hong nei mite nuntaakna, hoihtak kemin, cingin, amaute hangin dahin kap zawh zah dong dingin kisam hi.

5. THU NAGIH SIAMNA

    Bishop i cihte in thungaih daan a siam, nungzui muanhuia hih kul ding hi. Thu ngaihsiamna in, a zak thu le late bil sungah khuum dakdakin san siam ding uh hi. Ahi zongin na thungente khempeuh thukim Amen a ci pahpah mite ki-um cihsak kei inla, na tuuno te kiangah kha an vaak dingin zin kawikawi lecin, na thuzuite tawh kimu in nop nasak mahbangin, amaute acing akem siampite tawh zong hoihtak thu kikup pih dingin thupi pha mahmah hi. Tonu Maria mah-bangin, Pasian hong piak thupha hehpihnate a hawmkhia siamte hita un.
Siampite in, Bishopte adingin, na kinaipih pen na lawm it bel hi sak in. A nunung pen ah kong gen nop thu in, Siampite tawh ki-thutuak khut kilenkhawm ding leh a maute it in, lawmta bang a om khawm khitteh thapia in a hanthawn tawntung ding na hihna thu phawk den tawntung un, ci-in tha pia in a vaikhak ngiat hi.

Sia Bernard Lian