A sia leh a pha galdona ah hotkhiatna thumah teel in.

By Robin Gomes
25 Oct 2019
(Vatican News)

I nuntakna sung ah thupha leh mawhna pen galdo tawntung hi. Ni tumin nikhat abei ciangin ei le ei kisit tel kik, ki en pha kik in, i khensatna, i sepkhiatna te in Pasian kiang pan maw, ahih kei leh dawimangpa in hongs awl maw, cih pen etphat ding ahi hi, ci-in Casa Santa Marta biakinn ah akibawl Friday, Zingsang Missa bawlna ah Pope Francis in gen hi.

Eite lungsim sungah a piangthu te teeltak i theihzawh na ding Pasian kiangah khuavak ngen un ci-in Pope in hong hanthawn hi. Na hoih nap ha sepkhiat ding lunggulh na leh sepkhiat zawh lohna thu, i lungsim galdona aom tawntung na thu, Paul in Rome thuzuite kiangah a thugen siksan in Pope in thuhilhna a nei hi.


Eite’sungah lungsim galdona
    Paul in “Ahih noploh siatna te a gamta zaw sop hi”(Rom 7:19) ci-in gen ahih manin guallel ding hi, ahih keileh hell sung tung ding hi, ci-in a ngaihsun zong om kha thei ding hi. Ahih hangin, Paul pen misiangtho na suak hi. Khasiangtho makaihna tawh na hoih sep ding, a gilo kha-nin i sawlna tawh siatna sep ding pen  misiangtho te in zong na tuak kha uh hi. Amau nuntakna sungah hih bang galdona aom tawntung ahi hi. Mikhempeuh pen nisim galdona ah akihel gai i hi hi.

    ‘Ka nuntakna sungah hihbang galdo na om kei. Thupha ngah ing. Ka lungnuam tawntung hi,’ a cih i om leh, nang pen thupha ngah na hi kei hi. Bang thu teng piang hiam, cih a tel lo mi hi zaw hi, ci-in Pope in thuhilhna nei hi.

    Hih bangin nisim nuntakna ah galdo in i om a, tu-ni, zingciang, nitawp ni ciang dong a gualzo te ihi hi, ci-in Pope in gen hi. Upna hanga thahna athuak misiangtho te in upna khahsuah lo in atawp dong galdo te ahi uh hi. Misiangtho Therese of the Child Jesus zong, lupmun ngak in aom lai tak, kha-nin kha-gilo in Pasian kiang pan ama’kha sutkhiat sawm mawk hi. Amah ading athuak hak pen galdo hun pen tawpkhak galdo hun ahi hi.

Tawlnga inla ngaihsun phot in.
    Nisim nuntakna ah galdona aom tawngtung hangin, thuak hak i sak pha deuh hun na om lai hi. Tua bang hun ading, tu-ni Laisiangtho sungah hih bangin gen hi. “Vanle lei na et uh ciangin a piang ding thu thei na hih uh leh, tu-hun thu te bang hangin theithei lo na hi uh hiam.”(Luke 12:56)
    Pope in agen mah bangin ei Christian te pen na tampi sepkhiat sawm in i buaipih mahmah hi.Ahih hangin eite’sungh bang teng piang hiam, tua bang haksatna teng kua in hong makaih hiam, cih pen i ngaihsun ngei kei hi. I nuntakna pen lampi dung ah avak vai te tawh aki bang hi. Lampi a i pai kawm in i utut na peuh, i deihna aom na peuh ah khuakha in, adangna te i awlmawk mahmah kei hi.

Thupha leh mawhna
    Thupha leh mawhna pen a kido tawntung hi. Hibanga ze-et bawlsiatna pan kaikhia in hong hon nuam i Topa leh eite hong simmawh in hong lawnthal nuam kha-nin pen akido tawntung ahi hi. Tua ahih manin lampi ah khuakha in a mawkpai, kim le pam ah bang teng piang, cih a thei lo te i hih loh ding, i sepkhiatna te Pasian hongsawl na tawh a sem maw, dawi mangpa leh ei angsung theihna pan hong luangkhia maw, cih pen i kan ding kisam hi, ci-in Pope in hong hanthawn hi.

Ni khat abei ma in, tu-ni sungin athupi bang teng sem ka hiam, ci-in en-pha kik zawh na dingin minutes nih minutes thum bang daitak in lungngai kik ding ki sam hi. Migensiatna, huatna leh thupha bawlna i phawk kik ding hi. I sungah bang teng piang hiam cih i tel na dingin hih bang gamtatna, bangin hong piangsak, hong tawsawn hiam, cih i ki dot kik ding ahi hi. Migensiat ding lungsim tawh i kim i pam thu, midangte’innsung thu te i thei hi. Ahi hangin ei te lungsim sungah bangteng piang hiam cih  i thei kei hi, ci-in Pope in thugen na nei hi.


Vandaitui